བོད་ཀྱི་སློབ་ཆེན་པ་དག་ལ་དཔེ་ཀློག་སྐོར་གླེང་བ།

རྩོམ་ཡིག་འདི་ཐེངས་ 94 བཀླགས་འདུག

བོད་ཀྱི་སློབ་ཆེན་པ་དག་ལ་དཔེ་ཀློག་སྐོར་གླེང་བ།

                                          བོད་བཞུགས་རྩོམ་པ་པོ་ཞོགས་དུང་།


སློབ་ཆེན་སློབ་མ་རྣམས་མཐར་ཕྱིན་ལ་ཉེ་བ་ན། ཁོ་ཚོས་འབྲེལ་ཡོད་ཀྱི་འགྲོ་ལུགས་མཐའ་དག་བསྒྲུབས་ཚར། ཁོ་ཚོར་མཚོན་ན་བྱ་བ་ཞིག་ཅི་ལྟར་རེག་གམ་སྙམ་པའི་སེམས་ཁུར་ལས་གཞན། མཇུག་མཐའི་དོན་བྱ་ཉག་གཅིག་ནི་མལ་ཐུལ་དང་མལ་སྟན་བསྒྲིལ་ཏེ་རང་རང་སོ་སོའི་གནས་སུ་བགྲོད་འགྲོ་བ་དེ་རེད། གོ་ཐོས་ལྟར་ན། དུས་དེར་སློབ་མ་ལ་ལས་མི་ལོ་བཞི་ནས་ལྔའི་བར་སྦྱངས་ཤིང་བལྟས་པའི་སློབ་གཞི་དང་ཟུར་ལྟའི་དཔེ་ཆ་རྣམས་གཅིག་ཀྱང་མ་ལུས་པར་ཤོག་ཧྲུལ་ཉོ་མཁན་ལ་བཙོངས་བཞག་སྐད། དཔེ་ཆ་ཤོག་ཧྲུལ་དུ་བཙོངས་པའི་དོན་ཕྲན་ཚེགས་དེས་ཡང་སྙིང་ཅི་ཞིག་མཚོན་ནམ། དཔེ་ཆ་བོངས་ཆུང་ཡང་ཁུར་ལྕི་བས་ལ་ལ་འདེགས་དཀའ་བར་ཁག་གམ། སློབ་ཆེན་ནས་མཐར་ཕྱིན་པ་ལ་ལས་ཤེས་བྱ་ཐམས་ཅད་རྫོགས་པར་བསླབས་ཚར་སྙམ་མམ། ཡང་། བྱ་བའི་སྟེང་ཞུགས་ཚེ་ལ་ལས་ཤེས་བྱ་སྤྱོད་སྒོ་མེད་ཅེས་སེམས་སམ། ཁོ་ཚོར་དྲན་འཆར་མི་འདྲ་བ་རེ་ཡོད་སྲིད་ཀྱང་དྲན་ཚད་འདི་རེད་ཅེས་ཚིག་ཐག་བཅད་དེ་བཤད་རྒྱུ་ཤིན་ཏུ་དཀའ་མོ་རེད། གང་ལྟར། ཡོན་ཏན་པས་དཔེ་ཆ་འདོར་བ་ནི་ཁོ་ཚོར་དགོས་པའི་ཤེས་ཡོན་འདོར་བ་ཁོ་ན་རེད། དེ་ནི་བཟོད་པར་དཀའ་པའི་ཉེས་དམིགས་རིགས་ཤིག་ཀྱང་རེད། གཅིག་བྱས་ན་ཁོ་ཚོས་སྣང་ཚུལ་གྱི་གནས་ལུགས་རེ་ཤེས་ཡོད་ཀྱང་སྲིད། དེ་ནི་ཕལ་ཆེར་མི་རྣམས་ཀྱི་ལས་བྱེད་པ་རུ་འབོད་པ་སྟེ། བྱ་བ་རེག་པའི་མི་ཚོས་དཔེ་ཆར་མི་བལྟ་བ་དང་ཤེས་ཡོན་མི་སྦྱོང་བའི་སྣང་ཚུལ་གྱི་གནས་ལུགས་ཤེས་པ་ཡིན་རྒྱུ་རེད། སློབ་ཆེན་མཐར་ཕྱིན་གྱི་བྱ་བ་རེག་པའི་མི་ཞིག་གམ་ཟླ་ཕོགས་ཟ་མཁན་ཞིག་ལ་ཆ་བཞག་སྟེ་བཤད་ན། ཁོ་ཚོས་ཟླ་ཕོགས་ལོན་པའི་ཚུན་ལ། སློབ་ཆེན་ནས་མི་ལོ་བཞི་ནས་ལྔར་སྦྱངས་པའི་ཡོན་ཏན་གྱིས་ཕྱིས་ཀྱི་ལས་འཁྱུར་ངལ་གསོའི་བར་གྱི་མི་ལོ་བཞི་བཅུ་ཡས་མས་ལ་འདང་ངེས་སྙམ་གིན་ཡོད་པ་འདྲ། དེ་ཡང་ས་ལེ་དབར་ཁྲི་ལ་བགྲོད་པའི་རླངས་འཁོར་ལ་སྣུམ་སྤྱི་བྲེ་བརྒྱ་ཡིས་འདང་སྙམ་པ་དང་འདྲ་བ་རེད།དུས་དེ་ནས་བཟུང་། ཤེས་བྱ་ཡོན་ཏན་ནི་ཁོ་ཚོ་དང་འབྲེལ་བ་གཏན་ནས་མེད་པའི་རྣམ་གྲངས་ལྷག་མ་ཞིག་ཏུ་ལྟ་གི་ཡོད་པ་འདྲ། རྒྱུ་མཚན་ནི། ཁོ་ཚོས་ཟླ་ཕོགས་ལོན་པ་ན་ཟླ་ཕོག་ལེན་སྤྱད་ཀྱི་ཤེས་བྱ་རྣམས་རིམ་གྱིས་བརྗེད་དེ་དཔེ་ཆ་མི་ཉོ་ལ་དཔེ་ཆར་ལྟ་བ་ཙམ་ཡང་མི་བྱེད། ༼བྱ་བ་རེག་རྗེས་དཔེ་ཆ་དུམ་པ་གཅིག་ཀྱང་ཉོས་མ་མྱོང་པའི་ལས་བྱེད་པ་གང་མང་མང་འདུག༽ ཁེ་ལས་ལས་ཁུངས་ན་ཡོད་པའི་མི་རྣམས་ལྟ་ཞོག རིག་གནས་ལས་ཁུངས་དང་། དགེ་རྒན་རུ་ཁག་ཏུ་ཡོད་པའི་ལས་བྱེད་པ་ཕལ་ཆེ་བས་ཀྱང་དེང་དུས་ཀྱི་དཔོན་ས་སྙེག་པའི་མི་རྣམས་ལྟར་དཔེ་ཆ་ལྟ་བ་དང་ཤེས་ཡོན་མུ་མཐུད་དེ་སྦྱོང་བ་ནི་བླུན་རྟགས་ཤིག་སེམས་གིན་ཡོད་པ་ལྟར་སྣང་། ༼དོན་དམ་དུ་དཔོན་ས་སྙེག་པའི་མི་རྣམས་ཀྱིས་ལྷག་པར་དུ་དཔེ་ཆ་ལྟ་དགོས་ཏེ། ཁོ་ཚོ་མི་ཕལ་པ་དག་གི་སྣ་འདྲེན་དང་མགོ་ཁྲིད་བཅའ་རྒྱུ་ཡིན་ཞེས་འདོད་གིན་ཡོད་པ་དང་། མི་ཡི་སྣ་འདྲེན་པ་དང་མགོ་ཁྲིད་པའི་ལས་བྱེད་པ་ཡིན་ན། ལྟོས་ས་ལྟོས་འཇོག་གིས་རང་ཉིད་གཞན་དག་དང་བསྡུར་བའི་བློ་གྲོས་བཟང་བ་དང་། ཤེས་རབ་ཆེ་བ། ནུས་རྩལ་ལྡན་པ། ཀླད་པ་མྱུར་བ་སོགས་ཆ་ཡོངས་ནས་ཀུན་གྱི་མིག་དཔེ་ལྟ་བུར་འགྱུར་དགོས་རབས་འདུག དེ་ཡང་དཔེ་ཆ་འདྲ་མིན་སྣ་ཚོགས་བལྟས་ཏེ་ཤེས་ཡོན་དང་། བློ་སྦྱོང་། ཀུན་སྤྱོད་སོགས་ཇེ་ལེགས་དང་ཇེ་མཐོར་མ་བཏང་ན། ཀུན་གྱི་མགོ་འདྲེན་བཅའ་རྒྱུ་ཡིན་ཟེར་བ་ཤིན་ཏུ་དཀའ་ཞིང་། དཔོན་གྱི་ཁྲི་འཕང་ཇི་ལྟར་མཐོ་ཡང་མིང་ཐོབ་ཙམ་ལས་ལྷག་གིན་མ་རེད། འུ་ཚོའི་དཔོན་པོ་ཆེ་ཆུང་ཡོད་རྒུས་ལས་ཆུང་དོན་ཆུང་ཙམ་ལས་ནུས་གིན་མེད་པའང་རྒྱུ་རྐྱེན་གཙོ་བོ་དེ་ལ་ཐུག་འདུག་སྙམ།༽ དཔེ་ཆ་ཤོག་ཧྲུལ་དུ་འཚོང་མཁན་གྱི་སློབ་མ་དེ་དག་གིས་ཀྱང་སྣང་ཚུལ་དེ་རིགས་མཐོང་བའི་དཔེ་ཆ་ཤོག་ཧྲུལ་དུ་བཙོངས་བ་ཡིན་རྒྱུ་རེད། དེང་དུས། བརྙན་འཕྲིན་དང་། རླུང་འཕྲིན། རྩིས་འཁོར་དྲ་བ། ཚགས་པར་སོགས་ཤེས་བྱ་བརྒྱུད་སྒྲོག་གི་ལམ་བུའི་རྣམ་གྲངས་སྔར་ལས་མང་ནའང་། དེ་དག་གི་དཔེ་ཆའི་ནུས་པའི་དོ་ཟླ་མི་འོང་སྟེ། དཔེ་ཆ་ནི་ཤེས་བྱ་ཐེག་པའི་ཕུང་པོ་ཐུན་མོང་མ་ཡིན་པ་ཞིག་ཡིན་པ་དང་། ཤེས་བྱ་རྣམས་ཡུན་རིང་ཉར་ཚགས་རུང་བའི་ཉེར་སྤྱད་ཁྱད་པར་ཅན་ཞིག་ཡིན་པར་མ་ཟད། ནུབ་གླིང་གི་མཁས་པ་ཞིག་གིས། དཔེ་ཆ་ལེགས་པར་ལྟ་བ་ནི་རླབས་ཆེན་གྱི་སྐྱེས་བུ་ཞིག་དང་ཁ་ཏ་བྱེད་པ་དང་གཅིག་པ་གཅིག་རྐྱང་རེད་ཅེས་གསུངས་པའི་ཕྱིར་རོ།། འུ་ཚོ་རྣམས་མ་གཞི་ནས་ཤེས་ཡོན་ལ་དགའ་བའི་མི་རིགས་ཤིག་རེད། འུ་ཚོའི་མི་སེར་རྣམས་ཀྱིས་”དཔེ་ཆ་པ་”ཞེས་ནམ་རྒྱུན་ཡར་ས་ན་འཇོག་ཅིང་། དཔེ་ཆར་ལྟ་མཁན་ལ་དུས་དང་རྣམ་པ་ཀུན་ཏུ་བརྩི་འཇོག་ཆེས་ཆེར་བྱེད་པ་རེད། དེང་དུས། ནུབ་གླིང་པ་རྣམས་ཀྱིས། འགྲོ་བ་མི་ནི་ཤེས་ཡོན་དཔལ་འབྱོར་གྱི་དུས་རབས་ལ་སླེབས་འདུག་ཅེས་བཤད་གིན་འདུག ཚུལ་དེ་འུ་ཚོའི་ཡོན་ཏན་པ་རྣམས་ཀྱིས་ཀྱང་ཤེས་ཡོད་ཚོད་རེད། སྔོན་ཐོན་རྒྱལ་ཁབ་ཀྱི་སྲིད་གཞུང་སྡེ་ཁག་དང་། ཁེ་ལས་ལས་ཁུངས། བྱ་ལས་ལས་ཁུངས་དག་གིས་མི་མདུན་ལམ་ཅན་ནམ་འཇོན་ཐང་ཅན་ཞིག་བཀོལ་དུས། ཁོ་ཚོས་གླ་ཡོན་མཐོན་པོ་བྱིན་ནས་བསླུ་བྲིད་གཏོང་བ་མ་ཡིན་པར། གང་དེར་ནུས་རྩལ་དང་འབྱུང་སྤུས་སོགས་ཡང་བསྐྱར་མཐོ་རུ་འདེགས་པའི་སློབ་གསོ་མྱོང་དུ་འཇུག་པ་རེད་ཅེས་ཟེར། དེར་མ་ཟད། ”མུ་མཐུད་སློབ་གསོ་”དང་”ཚེ་གང་སློབ་གསོ་”ཞེས་མི་ཚེ་གང་པོར་སློབ་གསོ་མྱོང་བཞིན་སློབ་གཉེར་བྱེད་པའི་འགྲོ་ལུགས་དེ་ད་ལྟ་འཛམ་གླིང་སྤྱི་ཡི་གོམས་སྲོལ་ལྟ་བུ་ཞིག་ཏུ་ཆགས་འདུག མི་རྣམས་ཀྱིས་ཤེས་ཡོན་ལ་དེ་ལྟར་མཐོང་ཆེན་བྱེད་ནས་སྦྱོང་བ་ནི་གཅིག་ཏུ་མི་བུ་རང་ཉིད་ཀྱི་འཚོ་གནས་བདེ་སྐྱིད་འབྱུང་ཕྱིར་དང་། གཉིས་སུ་མི་ཡི་འཇིག་རྟེན་འདི་ཕྱོགས་ཡོངས་ནས་བཟང་ལེགས་དང་ཕུན་ཚོགས་སུ་གཏོང་ཕྱིར་རེད། ཡིན་ནའང་། ན་ནིང་དོ་ཚིགས་འུ་ཚོ་རྣམས་དེ་ལས་ལྡོག་སྟེ་དཔེ་ཆ་འཁོ་བའི་མི་རྣམས་ཀྱིས་དཔེ་ཆར་མི་ལྟ་བ་དང་ཤེས་བྱ་ཡོན་ཏན་ལ་མི་དགའ་བ་ལྟ་བུ་ཆགས་པ་དེ་ཡང་སྙིང་ལང་ལ་ཐུག་ཡོད་དམ། སློབ་གྲྭར་འགྲིམ་མཁན་དང་ལས་བྱེད་པ་རྣམས་ཀྱིས་རྒྱུ་མཚན་རེ་སྟོན་རོགས། དོན་དམ་དུ། དཔེ་ཆ་དོར་བས་ནི་ཤེས་བྱ་དོར་བ་ལས་གཞན། ཧུར་བརྩོན་དང་། སྡུག་རུས། ཡར་བསྐྱེད་སོགས་མི་རིགས་འདིར་དགོས་ངེས་ཀྱི་སྙིང་དག་ཀྱང་རང་བཞིན་གྱིས་དོར་སོང་བ་རེད། རྒྱུ་མཚན་ནི། དཔེ་ཆར་ལྟ་བ་ལ་སྙིང་སྟོབས་དེ་དག་མེད་ན་རྒྱུན་སྲིང་དཀའ་བས་སོ།། ཁ་སང་དེ་རིང་། ཤེས་བྱ་དང་བརྡ་འཕྲིན་བརྒྱུད་སྒྲོག་བྱེད་པའི་བརྙན་འཕྲིན་དང་རླུང་འཕྲིན་སོགས་མི་རྣམས་ཀྱི་འཚོ་བའི་གྲུབ་ཆ་ཞིག་ཏུ་གྱུར་ཡོད་པ་ནང་བཞིན། དཔེ་ཆར་ལྟ་བའང་མི་རྣམས་ཀྱི་འཚོ་བའི་གྲུབ་ཆ་ཞིག་ཏུ་གྱུར་ན་འགྲིག་གི་རེད། དེ་ལྟ་མིན་ཚེ། འུ་ཚོར་དགོན་སྡེ་མ་གཏོགས་གཞན་ཅི་ཡང་མི་ལྷག་པའི་ཉེན་ཞིག་འདུག་པ་འདྲ། ཁོ་བོས་དེ་ལྟར་བཤད་འདོད། ངས་འཇུག་ཏུ་ཁ་ཚ་དགོས་གཏུག་གི་དྲི་བ་ཞིག་འདོན་རྒྱུ་ནི། དཔེ་ཆར་མི་ལྟ་བ་དང་ཤེས་བྱ་ཡོན་ཏན་ལ་མི་དགའ་བའི་ལས་བྱེད་པ་མང་བའི་མི་རིགས་ཤིག་ལ་མཇུག་མཐའི་རེ་བ་ག་འདྲ་འདུག་གམ། དྲི་བ་དེའི་ཞོར་ལ་ངས་ཤེས་པ་ནི། མི་སུ་ཡིན་ཡང་རུང་། བྱ་བའི་ལས་གནས་གང་ན་ཡོད་ཀྱང་རུང་། དཔེ་ཆ་དང་ཁ་བྲལ་ཚེ། མཁས་པ་ཡིན་ཡང་བླུན་པོར་འགྱུར་ཉེན་འདུག་ལ། ཆེ་མཐོ་ཡིན་ཡང་ཆུང་དམན་དུ་འགྱུར་ངེས་པའི་གནས་ལུགས་དེའོ།།

བསམ་ཚུལ་ཕྲིས།

སྐུ་ཉིད་ཀྱི་གློག་འཕྲིན་ཁ་བྱང་གཞན་གྱིས་མཐོང་མི་ཐུབ། སྐར་རྟགས་ཅན་རྣམས་ངེས་པར་དུ་སྐོང་དགོས། *